|
C組賽事，中國挑戰烏茲別克。
中國上場戰至比賽末段以0:1不敵南韓，全場表現其實已相當不俗，一眾小將亦已做足教練郝偉的部署，先鞏固防務再謀後動，最終輸波亦無話可說。老實說，以中國球員現有的人腳，要用進攻足球去爭取出線，實在是不切實際，可惜足球比賽往往多是久守必失，隊長兼王牌前鋒張玉寧上場更受傷退下火線，暫時未知傷勢如何，無疑令中國的鋒力弱上加弱。如今中國面對兩難之局，未有分落袋，但強攻又無着數，今場鬥烏茲別克，別無他法下，我預計中國唯有繼續穩守，希望靠死球去製造威脅。
烏茲別克上場雖然僅靠12碼先開紀錄，但其實整場比賽的控球率差不多達6成半，只可惜一直未能攻入「燕梳球」，最終被伊朗的手榴彈戰術轟破大門，痛失2分。烏茲別克身為衞冕冠軍，要穩陣出線的話，今場肯定會有必勝中國的決心，逐瓣去秤的話，烏茲別克無論心態、質素、身型均比中國優勝，今場3分料可手到拿來。
